Hizkuntzaren keinua
Egile batzuk
Kontseilua, Andoain (Gipuzkoa), 2012.

Aurelia Arcocha

« Euskaraz bizi » aldarrikatzen dut gaur. Lehen « Bai euskarari » aldarrikatu nuen bezala. Karrikan. Ordea, esloganetarik at joan behar da. Leku arras gutitan baita gaur bizitzen egun oroz xinpleki euskaraz. Naturaltasun osoz erran nezake. Pentsatu gabe ere euskaraz ari zarela. Zorigaitzez, esloganaren erabili beharrak salatzen du euskararen egoera linguistikoa zenbatetarainokoa den hauskorra. Euskararen egoera nehon ez baita normala eta naturala. Euskal Autonomia Erkidegoan ez ere. Zer erranik ez beraz Nafarroa Garaian ? Ahalke egingarria baita gaur Nafarroa Garaian euskarak jasaten duen diskriminazio linguistikoa. Arrazakeriaren antzekoa dela erran nezake. Euskara gaitzetsia baita gaur momentu honetan Euskal Herriko eremu batzutan. Eta Zuberoan? Nafarroa Beherean ? Lapurdin ? Han denetan baino hauskorragoa da euskararen egoera. Ofizialtasunik ere ez baitu lortu oraindik. Eta denek badakigu ofizialtasuna ez dela aski. Euskal Herriko lau haizetan historikoki zapaldua izan da euskara : merezi du beraz euskarak konponketa. Fronteraren bi aldetan. Estatuek planifikatu zutelako, duela aspaldi ja, euskararen desagertzea. Euskararen salbatzea euskaldunen konponketa historikoaren parte zentrala da.